6 حاجات تعملهم لو انت مخنوق او مكتئب

الإكتئاب بيجي لناس كتير مننا اوقات كتير بيحس انه مخنوق ومتضايق اغلب الوقت وقاعد زهقان والطاقة بتاعته بتقل مش عاوز يقوم من مكانه ولا يعمل حاجة والحاجات اللي كان بيحب يعملها مبيعملهاش وشهيتك بتفقدها ومبتعرفش تنام بسهولة وبتبقى حاسس انك محطم من الآخر لذلك اخترنالك 6 حاجات ممكن تعملهم يقللوا من خنقتك او اكتئابك 


1- اتفرج على أفلام او مسلسلات 


مشاهدة فيلم او مسلسل او برنامج او عرض كوميدي بيضحكك او انت بتحبه هيساعد في تحسين حالتك المزاجية شوية وطبعا مفيش مانع من شوية تسالي معاه شوية فشار , كيس شيبسي عائلي D"= 


2- اتمشى شوية 

مش هقولك بقى كلام صحي وبيقلل من الاصابة بالضغط والسكر وبتخسس وتحرق دهون وبتنشط الجسم ومش عارف ايه بس فعلا لو اتمشيت شوية وشميت شوية هوا نضيف هتحس باختلاف شوية وتحسن حتى لو طفيف يفضل وقت ما بعد الفجر لحد الشروق ويا سلام لو على البحر او الكورنيش 



3- اتكلم مع حد بتحبه

شوف مين الشخص اللي بتحب تتكلم معاه او بتحب تقعد معاه وبتفرح لما تشوفه او تتكلم معاه وروح اقعد معاه وكلمه , علماء النفس بيقولولنا ان الاصدقاء بيقللوا من الاصابة بالاكتئاب عشان نشاط اجتماعي بتتكلموا مع بعض وتهزروا وتضحكوا وتخرجوا لذلك شوف صاحب او صاحبتك روح اقعد معه اتكلم معاه فضفض ولو بتحب شخص وبعيد عنك كلمه ع النت المهم فضفض لحد صدقني هتستريح شوية لما تطلع اللي جواك خصوصا لو لحد بتحبه هتبقى كمان قويت العلاقة بينك وبينه 


4- اسمع الحاجة اللي انت بتحبها




سماع الموسيقى او الاغاني بيحسن من الحالة النفسية عندك كيميا جواك بتتغير فيه مادة اسمها الاندروفين بتتفرز ف المخ بتساعدك على التخلص من الآلام والعالم ابن سينا نصح بسماع الاغاني لتحسين الحالة النفسية وقال قبل كدة ان مسكنات الأوجاع ثلاث: المشي الطويل، الغناء الطيب، الانشغال بما يُفرح الإنسان. وطبعا مفيش مانع ان فيه ناس بتحب تسمع قرآن , القرآن بردو كلام ربنا وبيحسسنا بالراحة ف الآخر اعمل اللي يريحك واللي تحسه هيبسطك 

5- روح مكانك المفضل



روح المكان اللي انت بتحبه اللي انت بتحس فيه بالراحة او البهجة او الهدوء او المكان اللي بيفرحك او بتحب تقعد فيه مش شرط يكون هادي ممكن يكون البحر القهوة حديقة عامة اي حتة بتحبها وممكن تاخدها مشي لو قريبة وتسمع مزيكا وانت رايحلها وممكن تاخدلك كام سيلفي D": 


6- اعمل خير 



اعمل اي عمل خير هيبسطك اوي وهيشعرك بتحسن , انت ممكن تعمل حصالة وتحط فيها مثلا اي كوين يتبقى منك من شراء اي حاجة واخر الشهر تطلعه صدقة او ممكن تتبرع بالاكل الزايد عندك لاي حد محتاج او تتبرع بهدومك اللي مش محتاجها او ممكن تعلم حد تعرفه عربي وحساب لو هو كبير وامي , جارك مثلا , اي حاجة من الحاجات دي ممكن تساعدك كتير وتشعرك بالسعادة والفرح والرضى عن النفس وانك عملت حاجة كويسة 


دي الحاجت اللي جات ف بالنا وقولنا نشاركوا بيها ونساعدكوا , انتوا شاركونا لما بتبقوا مخنوقين بتعملوا ايه ؟ 

شارك الموضوع

مواضيع ذات صلة

هتفرحنا بتعليقك =')